Քննարկվեցին Արցախից բռնի տեղահանված անձանց կարգավիճակի և սոցիալական իրավունքների իրացման խնդիրները

Օգոստոսի 31-ին «Իրավունքների պաշտպանություն առանց սահմանների» (ԻՊԱՍ) ՀԿ-ն Երևանում անցկացրեց «Արցախից բռնի տեղահանված անձանց կարգավիճակի և սոցիալական իրավունքների իրացման ոլորտում իրավակիրառ պրակտիկայի խնդիրներ» թեմայով քննարկում։

«Իրավունքների պաշտպանություն առանց սահմանների» ՀԿ նախագահ Արաքս Մելքոնյանն իր խոսքում նշեց, որ կազմակերպությունը ուշադրության կետրոնում է պահում Արցախից բռնի տեղահանվածների իրավունքների պաշտպանության հարցը, այդ թվում՝ կարգավիճակի ու սոցիալական իրավունքների իրացման համար նրանց տրամադրելով անվճար իրավաբանական աջակցություն։

ԻՊԱՍ-ի փաստաբաններ Նինա Հակոբյանը և Տաթևիկ Սիրադեղյանը ներկայացրին կազմակերպության կողմից իրավաբանական աջակցություն ցուցաբերելու շրջանակներում արձանագրված խնդիրները։

Մասնավորապես, անդրադարձ կատարվեց քաղաքացիության և փաստաթղթերի վերականգնման խնդիրներին։ Ներկայացված պրակտիկայի համաձայն՝ ծննդյան, ամուսնության և այլ փաստաթղթերի բացակայությունը կամ տվյալների անհամապատասխանությունը կարող են խոչընդոտել քաղաքացիության դիմումի ներկայացմանը, իսկ դրա ձգձգումը՝ նաև բնակարանային և այլ աջակցության ծրագրերից օգտվելուն։ Որոշ դեպքերում փաստաթղթերի վերականգնման համար քաղաքացիները ստիպված են լինում դիմել նոտարական կամ դատական ընթացակարգերի, ինչը հանգեցնում է լրացուցիչ ժամանակի և ծախսերի։

ՀՀ վարչական դատարանի դատավոր Ելենա Առաքելյանը ներկայացրեց վարչական դատարանում քննվող համապատասխան վարույթների առանձնահատկությունները։

Քննարկման ընթացքում մասնակիցները մտքեր փոխանակեցին նաև կենսաթոշակի նշանակման և աշխատանքային ստաժի հաստատման, աջակցության ծրագրերից օգտվելու, սեփականության իրավունքի և մի շարք դատավարական խնդիրների վերաբերյալ։