Վարչական դատարանը Շաքարային դիաբետ, տիպ 1 ախտորոշումն ունեցող անձի նկատմամբ հաշմանդամություն սահմանելու խնդրով ևս 1 հայց է բավարարել 

ՀՀ վարչական դատարանը բավարարել է  «Իրավունքների պաշտպանություն առանց սահմանների» ՀԿ-ի իրավաբան Նինա Հակոբյանի վստահորդի պահանջն ընդդեմ Միասնական սոցիալական ծառայության` հաշմանդամության երրորդ խումբ սահմանելուն պարտավորեցնելու պահանջի մասին։

Հայցվորը ներկայացված հայցադիմումով հայտնել է, որ մանկուց ունի շաքարային դիաբետ, տիպ 1 ախտորոշումը և վերջինիս նկատմամբ մինչև չափահաս դառնալը սահմանված է եղել հաշմանդամ երեխա կարգավիճակը: Նա չափահաս դառնալուց հետո սահմանված կարգով դիմել է ՀՀ աշխատանքի և սոցիալական հարցերի նախարարության միասնական սոցիալական ծառայություն՝ հերթական անգամ վերափորձաքննություն անցնելու և իր նկատմամբ հաշմանդամության խումբ սահմանելու նպատակով:

Ինչպես նման գործերով դատարան դիմած ԻՊԱՍ մյուս վստահորդների դեպքում, այս դեպքում ևս բժշկասոցիալական փորձաքննության և վերափորձաքննության  համապատասխան որոշումներով ՄՍԾ-ն հայցվորին չի ճանաչել հաշմանդամություն ունեցող:

Արդյունքում դատարանը վճռել է բավարարել ԻՊԱՍ վստահորդի հայցը՝ պարտավորեցնելով Միասնական սոցիալական ծառայությանը վերջինիս նկատմամբ նշանակել հաշմանդամության երրորդ խումբ և անվավեր ճանաչել   Ծառայության բժշկասոցիալական փորձաքննական համապատասխան  որոշումները:

ՀՀ Աշխատանքի և սոցիալական հարցերի նախարարության Միասնական սոցիալական ծառայությունը մերժում է շաքարային դիաբետ, տիպ 1 ախտորոշումն ունեցող անձանց նկատմամբ հաշմանդամության խումբ սահմանելու դիմումները՝ պատճառաբանելով, որ այս հիվանդությունը կա՛մ օրգանիզմի ֆունկցիայի խանգարումը այն աստիճան չէ, որպեսզի հանգեցնի հաշմանդամության և /կա՛մ օրգանիզմի ֆունկցիայի խանգարումը անձի մոտ կենսագործունեության որևէ տեսակի սահմանափակում չի առաջացնում։

Վարչական մարմնի անհիմն որոշմումների պատճառով անձինք զրկվում են իրենց իրավունքները անարգել իրացնելու իրավունքից և երաշխիքներից, որը և հակասում է ՀՀ Սահմանադրությանը և ներպետական օրենքներին։ 2019-2025թթ ընթացքում կազմակերպություն 19 դատական հայց է  ներկայացրել ՀՀ վարչական դատարան, որոնցից 15-ը բավարարվել են։