ՄԻԵԴ-ը ճանաչել է հավաքների ազատության իրավունքի խախտումը «Սարգսյանն ընդդեմ Հայաստանի» գործով

Մարդու իրավունքների եվրոպական դատարանը Սարգսյանն ընդդեմ Հայաստանի գործով այսօր կայացրել է վճիռ, որով ճանաչել է դիմումատու Գոհար Սարգսյանի հավաքների ազատության իրավունքի խախտումը։

Գործը վերաբերում է 2015 թվականի փետրվարի 11-ին ՀՀ նախագահական նստավայրի դիմաց խաղաղ պայմաններում զոհված զինվորների ծնողների բողոքի ակցիան ոստիկանության ծառայողների կողմից բռնի ուժով ցրելու միջադեպին։ 

Ոստիկանները պահանջել են ակցիայի մասնակիցներին հեռանալ նախագահական նստավայրի մայթից: 

Երբ ծնողները հրաժարվել են պահանջը կատարել, ոստիկանները սկսել են հրել ծնողներին։ Նրանք Գոհար Սարգսյանին բռնել են ոտքերից ու ձեռքերից և, քարշ տալով, տեղափոխել դիմացի մայթ: Ոստիկանների գործողությունների հետևանքով Գոհար Սարգսյանի ինքնազգացողությունը վատացել է, նա ուշաթափվել է։

Մարդու իրավունքների եվրոպական դատարանն արձանագրել է, որ այս գործողությունների հետևանքով տեղի է ունեցել Գոհար Սարգսյանի հավաքի ազատության իրավունքի խախտում։ 

Դատարանը վճռով պահանջել է Հայաստանին դիմումատուին վճարել 9000 եվրո՝որպես խախտման բարոյական վնասի փոխհատուցում։

Դիմումատուի շահերը ՄԻԵԴ-ում ներկայացրել են փաստաբաններ Արաքս Մելքոնյանը և Հայկուհի Հարությունյանը: