Անձի իրավական վիճակը վատացնող դրույթները չպետք է հետադարձ ուժ ունենան

Քաղաքացիական հասարակության մի խումբ կազմակերպություններ՝ Իրավունքի զարգացման և պաշտպանության հիմնադրամը, «Թրանսփարենսի ինթերնեշնլ հակակոռուպցիոն կենտրոն» ՀԿ-ն, Ժողովրդավարության զարգացման հիմնադրամը,  «Հելսինկյան քաղաքացիական ասամբլեայի Վանաձորի գրասենյակ» ՀԿ-ն և «Իրավունքների պաշտպանություն առանց սահմանների» ՀԿ-ն կարծիք են հրապարակել ««Զինվորական ծառայության և զինծառայողի կարգավիճակի մասին» օրենքում փոփոխություն կատարելու մասին» ՀՀ օրենքի նախագծի վերաբերյալ:

Այսպես, կազմակերպությունները խնդրահարույց են համարում քննարկվող սոցիալական երաշխիքի շահառու հանդիսացող զինծառայողների շրջանակի նեղացումը (Նախագծի 1-ին հոդված)։ Եթե գործող կարգավորմամբ ծառայության վայրում բնակարանային պայմանների բարելավման կարիք է համարվում ծառայության վայրի վարչական տարածքից սեփականության իրավունքով բնակելի տարածություն կամ նույն հեռավորությամբ մշտական (փաստացի) հաշվառման վայր չունենալը, ապա առաջարկվող կարգավորմամբ այդպիսին կհամարվի 60  կմ համապատասխան հեռավորությունը։ Ըստ կազմակերպությունների՝ այս փոփոխությունը հետընթաց է պետության սոցիալական քաղաքականության տեսանկյունից։ 

Առավել խնդրահարույց է, սակայն,  այն, որ ծառայության վայրում ծառայողական բնակարանով չապահովվելու դեպքում ամսական դրամական հատուցում ստանալու իրավունքը դադարում է նաև այնպայմանագրային զինծառայողների համար, որոնց համար այդ իրավունքն արդեն իսկ ծագել էր, սակայն որոնք այլևս չեն բավարարում Նախագծի 1-ին հոդվածով սահմանվող նոր պայմանին (Նախագծի 2-րդ հոդվածի 2-րդ կետով նախատեսվող անցումային դրույթ)։ Կազմակերպությունները շեշտում են՝ նշված դրույթը ուղղակի կերպով հակասում է ՀՀ Սահմանադրության 73-րդ հոդվածով նախատեսված՝ անձի իրավական վիճակը վատթարացնող օրենքի՝ իր նկատմամբ կիրառվելու անթույլատրելիության սահմանադրական երաշխիքին: Ավելին, ՍԴՈ-723 որոշմամբ Սահմանադրական դատարանն անդրադարձել է նմանօրինակ մի կարգավորման և դիրքորոշում հայտնել առ այն, որ նոր կարգավորումները չեն կարող ազդել նախկինում գործող օրենսդրությամբ անձի ձեռք բերած իրավունքի վրա։

Ամփոփելով՝ կազմակերպություններն առաջարկում են Նախագիծը հանել շրջանառությունից կամ առնվազն Նախագծից հանել դրա 2-րդ հոդվածով նախատեսված դրույթը։

Իրավունքի զարգացման և պաշտպանության հիմնադրամ
«Թրանսփարենսի ինթերնեշնլ հակակոռուպցիոն կենտրոն» ՀԿ
Ժողովրդավարության զարգացման հիմնադրամ
«Հելսինկյան քաղաքացիական ասամբելայի Վանաձորի գրասենյակ» ՀԿ
«Իրավունքների պաշտպանություն առանց սահմանների» ՀԿ

Կարծիքն ամբողջությամբ կարդալու համար ներբեռնե’ք։