Զեկույցն ամփոփում է Քաղաքացիական համերաշխության հարթակի շրջանակներում Մարդու իրավունքների միջազգային գործընկերության (IPHR, www.iphronline.org) կողմից կազմակերպած փաստահավաք առաքելության արդյունքները:
Զեկույցի պատրաստմանը աջակցել են «Իրավունքների պաշտպանություն առանց սահմանների» և «Հելսինկյան ասոցացիա» հասարակական կազմակերպությունները:
Զեկույցում տեղ են գտել «Սասնա ծռերի» խմբի դատավարության ընթացքում դատարանի դահլիճում ամբաստանյալների նկատմամբ բռնությունները, փաստաբանների նկատմամբ կիրառված սանկցիաները, փաստաբանների մուտքի խոչընդոտման դեպքերը դատարանի դահլիճ:
Զեկույցը ներկայացրել է Լեհաստանում Մարդու իրավունքների Հելսինկյան հիմնադրամի հետազոտությունների բաժնի պատասխանատու Ջոանա Սմետեկը։
Միջոցառմանը մասնակցել է նաև «Իրավունքների պաշտպանություն առանց սահմանների» ՀԿ իրավական հարցերով փորձագետ Արաքս Մելքոնյանը:
Արաքս Մելքոնյանը իր խոսքում նշել է, որ դատական նիստերի ընթացքում իրականացված ստուգումները ընտրողաբար են իրականացվում: Նրա պնդմամբ՝ փաստաբանների ստուգումներն իրականացվում են միայն «Սասնա Ծռեր» խմբի դատավարությունների ժամանակ: Միաժամանակ, փաստաբանների նկատմամբ դատավարական սանկցիաները և դրանց հիման վրա կարգապահական վարույթները էականորեն ազդում են փաստաբանների կողմից իրականացված պաշտպանության արդյունավետության վրա, քանի որ ի լրումն պաշտպանյալների շահերի պաշտպանության, ստիպված են իրականացնել նաև իրենց պաշտպանությունը կարգապահական վարույթների ընթացքում: Սա, ըստ էության, հանդիսանում է «Սասնա Ծռերի» գործով ներգրավված փաստաբանների հետապնդում և միտված է դատավարությունից նրանց մեկուսացմանը:
Միջոցառմանը ներկա են գտնվել նաև Հայստանում գործող օտարերկրյա դիվանագիտական առաքելությունների, միջազգային կառույցների և մարդու իրավունքների ոլորտում գործող կազմակերպությունների ներկայացուցիչներ, ինչպես նաև փաստաբաններ, ժուռնալիստներ, ակտիվիստներ։
Նշենք, որ փաստահավաք առաքելությունը Երևանում տեղի է ունեցել 2017թ. սեպտեմբերի 3-9-ը, նպատակ ունենալով ուսումնասիրել «Սասնա ծռերի» դատավարություններում մեղադրյալների պաշտպան փաստաբանների առջև ծառացած խոչընդոտների վերաբերյալ փաստերը: Առաքելության պատվիրակներն անցկացրել են 45 հարցազրույց 33 փաստաբանների, հասարակական կազմակերպությունների, ակտիվիստների, լրագրողների, Փաստաբանների պալատի, ինչպես նաև Հայաստանի իշխանություններիների ներկայացուցիչների հետ: