Հայտարարություն ոստիկանության հերթական անօրինական գործողությունների մասին

2016 թվականի ապրիլի 22-ի երեկոյան ժամը 19:00-ից սկսած Երևան քաղաքի դեպի Բաղրամյան պողոտա տանող հատվածում ոստիկանությունը հերթական անգամ անօրինական կարգով միջամտեց և խաթարեց քաղաքացիների կողմից հավաքների ազատության իրավունքի իրացման փորձը:

Տասնյակ քաղաքացիներ՝ առնվազն 42, մարդ կրկին անօրինական կարգով բերման ենթարկվեցին ոստիկանության Երևան քաղաքի բաժիններ, որի ընթացքում քաղաքացիների նկատմամբ ոստիկանության կողմից նորից բռնի ուժ և վատ վերաբերմունք դրսևորեց:

Վնասվածքներ հասցվեցին նաև լրագրողներին և սահմանփակվեց նաև լուսաբանման աշխատանքներ իրականցնելու նրանց հնարավորությունները:

Քաղաքացիները ոստիկանության բաժիններում պահվեցին առնվազն հինգ ժամ: «Իրավունքների պաշտպանություն առանց սահմանների» ՀԿ ներկայացուցիչները հանդես են եկել բերման ենթարկված անձանց պաշտպանության համար ոստիկանության Արաբկիր բաժնում, որտեղ անձինք պահվել են մինչև 2016 թվականի ապրիլի 22-ի ժամը 24:00-ն:

Հատկանշկան է նաև այն հանգամանքը, որ ոստիկանության կողմից նման վերաբերմունքի դրսևորումները իրավական որևէ գնահատականի չեն արժանանում և պատասխանատվության չեն հանգեցնում: Դեռևս որևէ որոշում չի կայացվել 2015 թվականի հունիսի 23-ի հավաքի կոպտագույն խախտումները ոստիկանության աշխատակիցներին պատասխանատվության ենթարկելու համար:   

Նման փաստերը վկայում և ամրապնդում են այն համոզմունքը, որ ՀՀ ոստիկանությունը քաղաքական հրամանների իրացման լավագույն գործիքն է, որը յուրաքնաչյուր անգամ գործի է դրվում Հայաստանի Հանրապետության իշխանության կողմից իր իսկ քաղաքացիների նկատմամբ լայնածավալ անօրինականությունների իրականացման համար: