Դատարանը բավարարել է  կենսաթոշակ նշանակելու վերաբերյալ ԻՊԱՍ-ի  շահառուի հայցը

«Իրավունքների պաշտպանություն առանց սահմանների» ՀԿ-ի փաստաբան Նինա Հակոբյանը ՀՀ վարչական դատարանում ներկայացրել է ՀԿ-ի շահառու Լարիսա Բաղմանյանի շահերը՝ պահանջելով պարտավորեցնել Միասնական սոցիալական ծառայությանը նշանակել մեկ տարի շուտ տարիքային աշխատանքային կենսաթոշակ և հաշվառել նրա աշխատանքային ստաժում չներառված ժամանակահատվածները։

Լարիսա Բաղմանյանը 2026թ․ հունվարի 5-ին դիմել էր կենսաթոշակ նշանակելու համար, սակայն Միասնական սոցիալական ծառայությունը մերժել էր դիմումը՝ անհրաժեշտ 35 տարվա աշխատանքային ստաժի բացակայության պատճառաբանությամբ։

Վեճը վերաբերում էր Մարտակերտի արտադրական կոմբինատում՝ 1982-1991թթ․ և Մոխրաթաղի կոլտնտեսությունում՝ 1993-1998թթ․ աշխատած ժամանակահատվածներին։

ՀՀ վարչական դատարանը, գնահատելով ներկայացված փաստաթղթերն ու վկաների ցուցմունքները, հաստատված է համարել նշված ժամանակահատվածներում աշխատելու փաստը և 2026 թ․ հոկտեմբերի 5-ի վճռով բավարարել է հայցը։

Դատարանը նաև արձանագրել է, որ կարգադրության քաղվածքում առկա ուղղումը բավարար հիմք չէր աշխատանքային գրքույկում հստակ գրառված տեղեկությունները հավաստի չհամարելու համար։

Արդյունքում՝ դատարանը պարտավորեցրել է Միասնական սոցիալական ծառայությանը նշանակել Լարիսա Բաղմանյանին մեկ տարի շուտ տարիքային աշխատանքային կենսաթոշակ՝ այն վճարելով 2026թ․ հունվարի 5-ից՝ դիմումը ներկայացնելու օրվանից։