2024 թվականի մարտի 14-ին հրապարակվել է Հայաստանի առնչությամբ Տնտեսական համագործակցության և զարգացման կազմակերպության (ՏՀԶԿ) 5-րդ շրջանի մոնիթորինգային զեկույցը։ Զեկույցն անդրադառնում է կոռուպցիայի դեմ պայքարի համար կարևորագույն մի շարք ոլորտների օրենսդրական կարգավորումներին և պրակտիկային, հասցեագրում ոլորտի զարգացումները և առկա խնդիրները։
«Իրավունքների պաշտպանություն առանց սահմանների» հասարակական կազմակերպությունը իր ներդրումն է ունեցել զեկույցի պատրաստմանը՝ մասնակցելով դատական իշխանության և դատախազության համակարգի ոլորտների ուսումնասիրությանն ու գնահատմանը։ Ավելին, Կազմակերպության ներկայացուցիչը մասնակցել է ՏՀԶԿ հակակոռուպցիոն ցանցի 22-րդ մոնիթորինգային հանդիպմանը, որի ընթացքում էլ հաստատվել է Հայաստանի վերաբերյալ զեկույցը։
Զեկույցը պարունակում է կարևոր արձանագրումներ դատական իշխանության առնչությամբ։ Մասնավորապես, դրանում նշվել է, որ Հայաստանը պետք է միջոցներ ձեռնարկի, որպեսզի խուսափի դատավորների և դատական մարմինների անդամների նշանակումների քաղաքականացումից, օրինակ՝ արգելելով նախկին քաղաքական պաշտոնյաներին ընտրվել այդ պաշտոններում որոշակի ժամանակահատվածում։ Զեկույցով արձանագրվել է նաև, որ դատավորների համալրման գործընթացը ոչ միշտ է արժանիքահեն, քանի որ չեն պահպանվում Կոռուպցիայի կանխարգելման հանձնաժողովի կողմից տրված բարեվարքության ստուգման արդյունքները։
Մտահոգիչ արձանագրումներ են կատարվել և գնահատական տրվել նաև դատախազության համակարգում բարեփոխումների վերաբերյալ։ Նախ, ՏՀԶԿ-ն արձանագրել է, որ գլխավոր դատախազի ընտրությունը արժանիքահեն և մրցակցային չի եղել, գործընթացը եղել է քաղաքական։ Ավելին, Հայաստանը չունի ՏՀԶԿ չափանիշներին համահունչ դատախազության ինքնակառավարման մարմին, ինչը թույլ կտա բացառել քաղաքական ազդեցությունը դատախազության վրա։
Զեկույցը հասանելի է հետևյալ այստեղ։
«Տարբեր հարթակներից, միջազգային կառույցների գնահատման արդյունքում ընդհանուր առմամբ նույն պատկերին
«Փաստացի մեկ նամակի միջոցով կարևորագույն պաշտոններ զբաղեցնող անձինք իրենց լիազորությունները
«Մի վնասիր սկզբունքը կարևոր է։ Ոչ մեկս էլ չենք ուզում
«Ցավալի և մտահոգիչ է, որ Ադրբեջանը ծանուցել է Կարմիր Խաչի
