ԻՊԱՍ-Ը մասնակցեց կարողությունների զարգացման աշխատաժողովին

Կարևորելով կազմակերպության երկարաժամկետ կառավարման գործընթացն առավել համակարգված կերպով շարունակելը՝ «Իրավունքների պաշտպանություն առանց սահմանների» ՀԿ-ն ապրիլի 6-ին և 7-ին նախաձեռնեց ռազմավարական պլանի մշակմանը նվիրված աշխատաժողով՝ կազմակերպության աշխատակազմի համար: «Երբ մենք ստեղծվեցինք դեռ չէինք պատկերացնում վերջնական արդյունքում ԻՊԱՍ-ը ինչ է դառնալու, կար միայն հստակ պատկերացում թե ինչ խնդիրներ ենք ուզում լուծել, կար Հայաստանում մարդու իրավունքների իրավիճակը փոխելու մեծ ցանկություն»,- նշում է կազմակերպության նախագահ Սիրանուշ Սահակյանը:

Ներկայումս ԻՊԱՍ-ը կայացել է որպես կազմակերպված կառույց և առաջ է եկել առավել համակարգված կերպով աշխատանքը շարունակելու անհրաժեշտություն: Երկօրյա աշխատաժողովն, որն անցկացվեց Ծաղկաձոր քաղաքի «Ռոսիա» հյուրանոցային համալիրում նախաձեռնված էր հենց այդ խնդրի լուծման համար:

Նախաձեռնության հիմնական նպատակն էր մշակել կազմակերպության ռազմավարական պլանը գալիք երեք տարիների համար, փաստաթղթում պետք է հստակ արձանագրում ստանային կազմակերպության գործունեության ուղղությունները և ռազմավարական խնդիրները, որ կազմակերպությունը սահմանում է իր առջև: Աշխատանքային օրվա սկզբում՝ ԻՊԱՍ-ի աշխատակիցները SWOT գործիքի միջոցով վերլուծեցին կազմակերպության ուժեղ ու թույլ կողմերը, ինչպես նաև ուսումնասիրեցին արտաքին աշխարհի մարտահրավերներն ու հնարավորությունները: Այնուհետև ԻՊԱՍ-ի թիմը մասնակցեց թիմային խաղի: Խաղի նպատակն էր պարզել, թե որքանով է աշխատակազմը կայացած որպես ամուր թիմ և որքանով է ունակ կազմակերպված կերպով խնդիրներ լուծել: Մասնակիցների առաջադրանք էր սահմանափակ նյութերով ու սեղմ ժամկետներում լուծել դժվարին մի խնդիր և ստեղծել արդյունք: Մի քանի խմբի բաժանված ԻՊԱՍ-ի թիմը՝ ցուցաբերեց արագ կողմնորոշվելու, ժամանակի արդյունավետ կառավարման, պլանավորման ու աշխատանքը թիմում ճիշտ բաժանելու ունակություններ:

Մասնակից բոլոր խմբերը հաջողությամբ լուծեցին առաջարկված խնդիրը: «Ինձ շատ հետաքրքիր էր աշխատել ԻՊԱՍ-ի թիմի հետ,-նշում է Քեմբրիդջ համալսարանում ուսանած Տիգրան Բերթիզիանը, ով հրավիրված էր համակարգել ռազմավարական պլանի մշակման գործընթացը,- Աշխատանքի հենց սկզբից էլ հասկացա, որ գործ ունեմ կազմակերպված թիմի հետ: Թիմային խաղերի ընթացքում պարզ դարձավ, որ միմյանց հետ արդյունավետորեն աշխատելու հմտություններ թիմում առկա են,-ավելացնում է Տիգրանը,- նաև նկատելի էր փոխօգնության ու փոխարձ դրական ազդեցության ոգի առանց որի անհնար է դրական արդյունք ստեղծել»:

Աշխատանքը շարունակվեց SWOT վերլուծության ընթացքում հավաքագրած տվյալների ուսումնասիրությամբ ու կազմակերպության զարգացման հնարավորությունների դիտարկմամբ: Այնուհետև նախաձեռնվեց ռազմավարական պլանի փաստաթուղթի բովանդակային մասի քննարկումը խմբերով: «Իր գործունեության տարիների ընթացքում կազմակերպությունը հասցրել է կայանալ որպես մարդու իրավունքների պաշտպանության ոլորտում հստակ ուղություններ ունեցող հասարակական կազմակերպություն, զբաղեցնել իր ուրույն տեղը իրավապաշտպան ՀԿ-ների շարքում»,-նշում է ԻՊԱՍ-ի մոնիթորինգի և սոցիոլոգիական ուսումնասիրությունների բաժնի ղեկավար Ավետիք Մեջլումյանը,-«Թերևս պարբերաբար անհրաժեշտություն առաջանում է վերլուծել անցածդ ուղին ու խորհել ապագայում ծրագրվելիք նախաձեռնությունների մասին՝ չանտեսելով իհարկե միջավայրը, որում գործում ես», -ավելացնում է Ավետիքը: Քննարկման դնելով ԻՊԱՍ-ի անցած ուղին ու ձեռքբերումները՝ մասնակիցները կարողացան ուրվագծել կազմակերպության գործունեության հիմնական ուղղությունները ապագայի համար, ընդգծել այն ոլորտները, որոնցում կազմակերպությունն արդեն հասցրել է կայանալ, ինչպես նաև առանձնացնել կազմակերպության գործունեության համեմատաբար պասիվ ոլորտները, որտեղ դեռ անհրաժեշտ է կարողություններ կառուցել: Կազմակերպության խնդիրների կատարման գործընթացում աշխատակիցների ներգրավվածության խթանումն ու վերջիններիս բավարարվածությունը կարևորելով՝ իրականացվեց նաև աշխատակիցների կարիքների գնահատում: ԻՊԱՍ-ի թիմի յուրաքանչյուր անդամ մատնանշեց իր գործունեության ընթացքում ծագող կարիքը, ինչպես նաև ներկայացրեց այն ներդրումը, որն իր կարծիքով կարող է ունենալ կազմակերպության զարգացման ու առաջխաղացման գործում:

Երկօրյա դասընթացին մասնակցեց նաև Հայկուհի Հարությունյանը, ում առաջարկված էր կազմակերպության նախագահումը: Ռազմավարական պլանավորման աշխատանքներին մասնակցելը Հայկուհու համար հնարավորություն էր գործնականում պատկերացնել կազմակերպության ներուժն ու հնարավորությունները, աշխատակիցների մոտիվացիան ու մասնագիտական հետաքրքրությունները:
ԻՊԱՍ-ի թիմը վերադարձավ Ծաղկաձորից գործունեության զարգացման նոր գաղափարներով և ձևակերպած ռազմավարական ուղղություններով առաջիկա երեք տարիների համար: Կազմակերպության աշխատակիցները նշում են, որ աշխատաժողովից հետո իրենց համար շատ ավելի հստակ ու պատկերավոր դարձավ, թե կոնկրետ ինչ խնդիրների լուծման համար են ամեն օր աշխատանքներ իրականացնում: ԻՊԱՍ-ում շարունակվում է եռանդուն աշխատանքը կազմակերպության նպատակները իրականություն դարձնելու ուղղությամբ: Ռազմավարական պլանի մշակումը օգնեց ԻՊԱՍ-ի թիմին այդ խնդրին այսուհետ մոտենալ առավել համակարգված ու ուղղորդված:

post

https://prwb.am/2013/04/26/prwb-takes-part-skills-development-workshop/