ԿԱՐԾԻՔ

ԻՊԱՍ-ը և գործընկեր կազմակերպությունները առաջարկներ են ներկայացրել Հանրության գերակա շահի հիմքով սեփականության օտարման գործընթացում հանրային մասնակցության ապահովման վերաբերյալ

08.05.2026թ․ Իրավական ակտերի նախագծերի հրապարակման միասնական կայքում հրապարկվել է «Հայաստանի Հանրապետության կառավարության 2018 թվականի հոկտեմբերի 10-ի «Հանրային քննարկումների կազմակերպման և անցկացման կարգը սահմանելու և Հայաստանի Հանրապետության կառավարության 2010 թվականի մարտի 25-ի N 296-Ն որոշումն ուժը կորցրած ճանաչելու մասին» N 1146-Ն որոշման մեջ փոփոխություն և լրացումներ կատարելու մասին» ՀՀ Կառավարության որոշման նախագիծ (այսուհետ նաև՝ Նախագիծ), որով սահմանվում է հանրության գերակա շահ ճանաչելու մասին Կառավարության որոշման հանրային քննարկման կազմակերպման և անցկացման կարգը:

Մասնավորապես, Նախագիծը սահմանում է հանրության գերակա շահ ճանաչելու մասին Կառավարության որոշման նախագծերի հանրային քննարկման կարգ՝ երկու եղանակի պարտադիր համակցությամբ.

1. նախագիծը տեղադրվում է հանրային քննարկում իրականացնող մարմնի պաշտոնական կայքում և e-draft.am հարթակում, ինչպես նաև ուղարկվում է շահագրգիռ մարմիններին՝ կարծիքի,

2. պարտադիր իրականացվում են նաև հանրային լսումներ, որոնց ներգրավվում են նաև ձեռքբերողը, օտարվող գույքի սեփականատերերը, փաստացի տիրապետողները և գույքային իրավունքներ ունեցողները:

Նախագծով սահմանվում է նաև հանրային լսումների մասին անձանց տեղեկացնելու վերաբերյալ կարգավորումներ, որոնք ընդգրկում են հայտարարությունը ՀՀ հրապարակային ծանուցումների պաշտոնական ինտերնետային կայքում, լիազոր մարմնի և օտարվող գույքի գտնվելու վայրի տեղական ինքնակառավարման մարմինների պաշտոնական կայքերում հրապարակելու, ինչպես նաև համապատասխան մարզպետարանի կամ տեղական ինքնակառավարման մարմինների և վարչական շրջանի կամ բնակավայրի վարչական ղեկավարի նստավայրի հայտարարությունների ցուցատախտակի վրա փակցնելու պահանջ։

Կարևորելով հանրության գերակա շահերի ապահովման նպատակով սեփականության օտարման գործընթացի ամենավաղ փուլերում շահագրգիռ հանրության իմաստալից ներգրավման անհրաժեշտությունը՝ ԻՊԱՍ-ը և գործընկերները գտնում են, որ նախագիծը ենթակա է լրամշակման որոշ սկզբունքների հաշվառմամբ։ 

Ներկայացված կարծիքն ու առաջարկները կարող եք տեսնել այստեղ։

Իրավունքի զարգացման և պաշտպանության հիմնադրամ

«Թրանսփարենսի Ինթերնեշնլ Հակակոռուպցիոն Կենտրոն» ՀԿ

Ժողովրդավարության զարգացման հիմնադրամ

Իրավունքների պաշտպանություն առանց սահմանների

Հելսինկյան Քաղաքացիական Ասամբլեայի Վանաձորի գրասենյակ