Դատավորների նկատմամբ ԲԴԽ կարգապահական վարույթների ամփոփում․ փետրվար, 2023   

«Իրավունքների պաշտպանություն առանց սահմանների» ՀԿ-ն դիտարկել է Բարձրագույն դատական խորհրդի կողմից 2023 թվականի փետրվար ամսին քննված կարգապահական պատասխանատվության ենթարկելու վերաբերյալ 3 վարույթ։

Դրանցից 1-ը կայացվել է Սյունիքի մարզի առաջին ատյանի ընդհանուր իրավասության դատարանի դատավորի, 2-ը՝ Երևան քաղաքի առաջին ատյանի ընդհանուր իրավասության դատարանի դատավորի նկատմամբ։

Քննված 3 վարույթից 3-ով էլ կարգապահական պատասխանատվության ենթարկելու վերաբերյալ միջնորդությունները ԲԴԽ է ներկայացվել Արդարադատության նախարարության կողմից։

Քննության արդյունքում ԲԴԽ-ի կողմից միջնորդությունները բավարարվել են մեկով՝ հայտարարելով նախազգուշացում, մեկ վարույթով նկատողություն, մյուսով՝ լիազորությունների դադարեցում՝ էական կարգապահական խախտման հիմքով։

Միջնորդությունների էությունը․

• 1-ին՝ Արդարադատության նախարարության կողմից ներկայացված միջնորդության հիմքում դրվել էր այն հանգամանքը, որ Դատավորը թույլ է տվել վարքագծի կանոնների խախտումներ։ Մասնավորապես, դատավորը մեկ այլ դատավորի կարգապահական պատասխանատվության ենթարկելու հարցի վերաբերյալ ԲԴԽ կողմից որոշման հրապարակմանը նախորդող օրը հրապարակային կարծիք է հայտնել դատարանում քննվող գործի վերաբերյալ, ինչպես նաև որոշման եզրափակիչ մասի հրապարակումից հետո հրապարակայնորեն կասկածի տակ է առել տվյալ դատական ակտը և դատարանի գործողությունները։ Ըստ դատավորի կարծիքի տվյալ դատավորի լիազորությունները դադարեցնելը, կարգապահական տույժի տեսակ նշանակելը կամ կողմ քվեարկած ԲԴԽ անդամներին մնացյալից առանձնացնելը, ընգծելով հենց նրանց՝ իրենց կայացրած որոշման հետ ապրելու պարտականությունը, վկայում է որ կողմ քվեարկած դատավորները մասնակցել են ոչ օրինական դատական ակտի կայացմանը։

ԲԴԽ-ն բավարարել է Արդարադատության նախարարի կողմից հարուցած միջնորդությունը՝ դադարեցնելով դատավորի լիզորությունները էական կարգապահական խախտման հիմքով։

• 2-րդ՝ Արդարադատության նախարարության կողմից ներկայացված միջնորդության հիմքում դրվել էր այն հանգամանքը, որ Դատավորը թույլ է տվել վարքագծի կանոնների խախտումներ։ Աշխատանքային վեճով գործի քննությունը և լուծումը դատավորի կողմից իրականացվել է օրենքով դատավարական ժամկետների խախտմամբ, այն՝ է 11 ամսում, իսկ գործով կայացված դատական ակտը հրապարակվել և կողմերին է տրամադրվել սահմանված ժամկետից 1 տարի անց: ԲԴԽ-ն բավարարել է Արդարադատության նախարարի միջնորդությունը՝ հայտարարելով նկատողություն։

• 3-րդ՝ Արդարադատության նախարարության կողմից ներկայացված միջնորդության հիմքում դրվել էր այն հանգամանքը, որ Դատավորը,   2021թ․ ընդունված քրեական դատավարության օրենսգրքի համապատասխան համաձայնեցման վարույթի շրջանակներում մի քանի գործով մեղադրյալների նկատմամբ կիրառել է ազատազրման ձևով պատիժ և այն պայմանականորեն չկիրառելով սահմանել փորձաշրջան, սակայն հաշվի առնելով, որ նշված  գործերով մեղադրյալներն առաջին անգամ էին ոչ մեծ ծանրության հանցագործություն կատարել, և նրանց նկատմամբ օրինական ուժի մեջ մտած եզրափակիչ դատական ակտեր առկա չեն եղել, հետևաբար՝ գործել է օրենսդրության հետադարձ ուժ ունենալու կանոնը: Ինչպես նաև  դատարանն իրավազոր չի եղել հաստատելու համաձայնության մասին արձանագրությունները, քանի որ համաձայնության արդյունքով սահմանվող պատիժը չի համապատասխանել քրեական օրենքի ընդհանուր մասի վերաբերելի դրույթներին: 

ԲԴԽ-ն բավարարել է Արդարադատության նախարարի միջնորդությունը՝ հայտարարելով նախազգուշացում։

 Վերոնշյալ կարգապահական վարույթների դիտարկման ամբողջական արդյունքները կարտացոլվեն «Իրավունքների պաշտպանություն առանց սահմանների» ՀԿ-ի կողմից հրապարակվելիք վերջնական զեկույցում։