«Արևելյան գործընկերության ապագան. մարտահրավերներ և հեռանկարներ»

Քննարկման ընթացքում Հայաստանում Եվրամիության պատվիրակության ղեկավար, դեսպան Պյոտր Սվիտալսկին Հայաստանի իշխանություններին հորդորեց չսպասել և հենց այսօրվանից նախապատրաստվել Եվրամիության և Հայաստանի միջև վիզային ռեժիմի ազատականացման գործընթացին։

«Այսօրվանից սկսեք ձեր ներքին նախապատրաստությունները, որովհետև Վրաստանի, Ուկրաինայի և Մոլդովայի փորձը ցույց է տալիս, որ յուրաքանչյուր երկիր բազմաթիվ օրենսդրական և վարչարարական փոփոխություններ պետք է կատարի՝ անհրաժեշտ պահանջներին համապատասխանելու համար: Այնպես որ՝ ժամանակ մի կորցրեք և կատարեք ձեր տնային աշխատանքը, ու ես հուսով եմ՝ այդ պահը կգա: Իսկ այժմ եկեք աջակցենք վրացիներին և հաջողություն մաղթենք՝ վիզային ռեժիմի ազատականացումը ներդնելու հարցում, քանի որ դա լավ ազդեցություն կունենա Հայաստանի վրա»,- ասաց ԵՄ դեսպանը:

Նա հակիրճ անդրադարձավ նաև նոյեմբերին Եվրամիության և Հայաստանի միջև ստորագրվելիք նոր համաձայնագրին, շեշտելով՝ Բրյուսելում դրական են տրամադրված․ «Ես հավատում եմ, որ Բրյուսելի գագաթնաժողովից Հայաստանի համար լավ լուրեր կստացվեն»:

Նոյեմբերի 24-ին Բրյուսելում տեղի է ունենալու Եվրամիության Արևելյան գործընկերության գագաթնաժողովը, որի ընթացքում էլ նախատեսվում է Եվրամիության և Հայաստանի միջև Համափարպակ և ընդլայնված գործընկերության համաձայնագրի ստորագրումը: Այն փոխարինում է նախկին՝ Ասոցացման համաձայնագրին, որի ստորագրումը, հիշեցնենք, տապալվեց Հայաստանի՝ ՌԴ ստեղծած Մաքսային միությանն անդամակցելու որոշման պատճառով:

Դեսպան Սվիտալսկին այսօր ընդգծեց՝ Հարևանության ծրագրի հանդեպ Եվրամիության հետաքրքրությունն աստիճանաբար աճում է, և դա նկատելի կլինի նաև գագաթնաժողովի ընթացքում։ Եվրամիության պատվիրակության ղեկավարի խոսքով՝ Բրյուսելը մեծ ուշադրությամբ է հետևում Արևելյան գործընկերության երկրներին, այդ թվում՝ Հայաստանին։ Սվիտալսկին անդրադարձավ նաև, իր բնորոշմամբ, «աշխարհաքաղաքական խաղերին», շեշտելով՝ ԵՄ-ն չի ուզում նման խաղերի մասնակիցը դառնալ:

Բայց իրենք նաև չեն ընդունի, որ «այս տարածաշրջանի որևէ մասը դառնա բացառիկ ազդեցության գոտի»։ «Մենք չենք ուզում, որ մեզ դիտարկեն որպես ոչինչ չտվող խաղի մեջ ներգրավված կողմ: Եվրամիությունը չի ուզում այդ խաղը խաղալ: Մենք նաև հստակորեն մերժում ենք Եվրոպան կամ աշխարհի ցանկացած այլ մասը բացառիկ ազդեցության գոտիների բաժանելու գաղափարը»,- ասաց Սվիտալսկին:

Ասյօրվա քննարկմանը մասնակցում էր նաև Ուկրաինայից ժամանած Իրինա Սուշկոն, ով «Եվրոպան առանց սահմանների» հասարակական կազմակերպության ղեկավարն է։ Նրան ներկայացնելիս կազմակերպիչները հայտարարեցին՝ Սուշկոն Ուկրաինայի եվրաինտեգրման հարցում մեծ ներդրում է ունեցել, դրա համար անգամ պարգևատրվել է Ուկրաինայի նախագահ Պետրո Պորոշենկոյի կողմից։ Սուշկոն իր ելույթում շեշտեց՝ Ուկրաինայի օրինակով կարող է ասել, որ եվրաասոցացումը շահավետ է հասարակության համար:

«Առանց վիզայի ռեժիմը միանգամայն իրական գործընթաց է և հասանելի նպատակ։ Եվ այս հարցում ես շատ եմ ուզում ձեզ աջակցել, հարգելի գործընկերներ։ Ես միանգամայն վստահ եմ, որ Հայաստանը ճիշտ ճանապարհի վրա է։ Դուք վիզաների ազատականացման հարցում բավականին լուրջ և գործնական քայլ եք արել, խոսքը վիզաների ազատականացման համաձայնագրի մասին է»,- իր ելույթում ասաց ուկրաինացի հյուրը։

Քննարկման կազմակերպիչ, «Գլոբալիզացիայի և տարածաշրջանային համագործակցության» կենտրոնի տնօրեն Ստեփան Գրիգորյանն էլ նշեց՝ կարծիք կա, թե Հայաստանի հասարակությունը ռուսամետ է, մինչդեռ «այնքան էլ այդպես չէ»: Գրիգորյանն ասաց, թե ամռանը հարցումներ են արել ու պարզել՝ Հայաստանի քաղաքացիների 78 տոկոսը բացասական է գնահատել 2013-ին Եվրամիության հետ ասոցացման համաձայնագրից հրաժարումը: