Դատավորների թեկնածուների ցուցակի համալրման որակավորման քննությունների դիտարկում

«Իրավունքների պաշտպանություն առանց սահմանների» ՀԿ կողմից 2019թ. հոկտեմբեր և դեկտեմբեր  ամիսներին իրականացվել է դատավորների թեկնածուների հավակնորդների որակավորման արտահերթ քննությունների դիտորդություն:

Իրականացված դիտորդության հիման վրա կազմակերպության կողմից պատրաստվել է հաշվետվություն՝ «Դատավորների թեկնածուների ցուցակի համալրման որակավորման քննությունների դիտարկում» թեմայով:

Կազմակերպության կողմից քննությունների դիտարկման արդյունքում վեր են հանվել որակավորման գրավոր և բանավոր փուլերի ընթացքում արձանագրված խնդիրները:

Արձանագրված դիտարկումների առնչությամբ կազմակերպության կողմից ներկայացվել են նաև կոնկրետ առաջարկություններ՝

• Սահմանել օբյեկտիվ չափանիշներ քննական հանձնաժողովների անդամների ընտրության համար,
• Քննական հանձնաժողովների անդամներին ընտրել ըստ վերջիններիս մասնագիտական կարողությունների ու հմտությունների,
• Քննական առաջադրանքների չբացված օրինակների հետագա ճակատագրի վերաբերյալ հարցերին տալ հստակ օրենսդրական կարգավորում,
• Նախատեսել որակավորման գրավոր քննության աշխատանքների գնահատման հստակ չափանիշներ և միավորների նվազեցման սանդղակ,
• Հարցազրույցի փուլում հոգեբանական թեստի արդյունքում հավակնորդին տրամադրել հոգեբանի կողմից կազմված կարծիք-եզրակացություն,
• Սահմանել Բարձրագույն դատական խորհրդի անդամերի կողմից հնչեցվող հարցերի հիման վրա գնահատման որոշակի ու հավակնորդի համար կանխատեսելի չափանիշներ:

Դատավորների թեկնածուների ցուցակի համալրման որակավորման քննությունների դիտարկում